Saban peuting, sora tipi pasesedek jeung haseup roko. Mulek lir haseup pabrik. Di kamar leutik nu remeng-remeng, peuting ieu kuring sorangan kénéh, maturan guligah sajak luhureun asbak. Reup bray rohangan, leungeun teu daék cicing mencétan rémot, meusmeus warta kriminal, meusmeus iklan… Panon beuki karasa peurih, tapi hésé saré. Duh Gusti, sakapeung peurih haté, sono ka lembur… Tipi dipareuman, poék—mingkin seukeut tina jandéla kamar, lapat-lapat sora napas kuda. Sakapeung hohoang, asa nyakar garingna tikoro. Teu kungsi lila kadangu hujan turun, régang tatangkalan ngaregéh, méméh birahina tépa, nurih angen kuring…
Tulisan terkirim dikaitan (tagged) ‘Di Kamar Kontrakan’
FiksiMini Sunda: Di Kamar Kontrakan
Posted by Badru Tamam Mifka pada 11 Mei 2012
Ditulis dalam Ω Fiksimini Sunda | Dengan kaitkata: Badru Tamam Mifka, Di Kamar Kontrakan, Fikmin, Fiksimini Sunda | Tinggalkan sebuah Komentar »
